中環出更：「私貸之父」 孫女百日宴
前保良局總理兼亞洲聯合財務董事總經理長原彰弘家有喜事，事關囝囝長原京毅為佢添咗個孫女佳奈（Kana），令佢首嘗做爺爺嘅幸福滋味，孫女嘅生肖同佢一樣屬龍，難怪錫到入心。日前長原家族喺中環四季酒店為小龍女擺百日宴，到賀賓客逼爆現場。保良局主席梁寶珠、副主席鄭錦鐘夫婦等人拉隊送上祝福，台北經濟文化辦事處處長朱曦伉儷亦首次飲百日宴，佢激讚香港盛行嘅百日宴值得推廣，因為BB擺滿月酒時實在太細，唔好玩喎！
身為日籍台灣人嘅「私人貸款之父」長原彰弘，一直熱心慈善事業，今次事先聲明會將賀禮全數捐出，着賓客直接寫支票畀「港澳台灣慈善基金會」或保良局，佢當日見到老友們出手大方，即席宣布掏腰包各捐十萬元畀兩機構，引起台下一陣喝采。
眼仔睩睩唔怕人
港澳台灣慈善基金會主席兼好易通老細錢立祐話，十月初將免費招待一百名六十五歲長者，到台灣享受三日兩夜嘅特色旅遊，期間將見識台式飲宴「辦桌文化」，請長者享用地道美味嘅台菜。
精靈可愛嘅小龍女甚得靚媽咪顏怡（Nadia）真傳，眼仔睩睩唔怕生人，個個爭住同佢影相。Nadia嘅父母亦從台灣來探望愛女及外孫女，顏爸爸係台灣望族辜濂松嘅表弟，今次首次做外公，開心到笑不攏嘴。長原彰弘兩父子致詞時，都感謝Nadia辛苦懷胎十月，場面感人。爺爺恨抱孫恨到出面，講明冀望「多子多孫」，咁至「多福氣」，故催促囝囝及新抱咪偷懶，要繼續生多幾個至得，最好明年即刻添多名乖孫，賓客聞言開心起哄，約定明年再嚟飲過。
卓妮