一個人嘅花名往往反映一個人嘅性格，好似前特首曾蔭權咁吖，響噹噹嘅花名叫「貪曾」，非常生動咁反映佢嘅性格係貪得無厭。功夫茶今日為大家介紹一個花名叫「老鼠平」嘅仁兄，佢嘅性格顧名思義好似老鼠，仲要係過街嗰隻。
四十七歲嘅老鼠平原名係曾潤平，先後以自己或者親友名義經營四間酒家，每次結業清盤都隱瞞公司資產，拖欠員工薪金，說服破產欠薪保障基金幫佢出糧。老鼠平最終被控以欺詐破欠基金七十八萬元，尋日一錘定音，法官大老爺裁定佢罪名成立，冇任何減刑理由之下判處監禁三年，五年之內不准出任公司董事。
法官話香港係自由商業社會，除咗依靠積極不干預政策，亦要依賴商人自律互信，被告行為帶來禍害，影響整個社會運作同香港嘅國際競爭力。法官仲話，破欠基金嘅錢來自政府，案件最大受害者係普羅大眾納稅人，斥責被告就好似人體嘅癌細胞，會對其他營商者造成壞榜樣。
老鼠平嘅犯罪行為大致上係咁嘅，佢將深水埗經營嘅酒樓結業之後改名原址重開，期間向清盤人隱瞞酒樓仍然擁有八十八萬元資產，令清盤人無法變賣支付欠薪欠債，要由破欠基金發放七十八萬元特惠金畀受影響員工。
介紹完一個騙子嘅呃錢故事，功夫茶想問問大家，騙人嗰個固然可惡，咁被騙嗰個又有冇責任呢？打一個譬喻吖，有一個茅山師傅對一個無知少女講，你跟我去開房上床吖，然後你就可以改運o架喇，改完運話唔定做大明星都得。無知少女被騙一次係天真，被騙兩次係愚蠢，若然被騙到第三次甚至四五六七八九次，大家覺得抵唔抵可憐呢？當然唔抵可憐啦，佢嘅父母知道之後甚至會大巴大巴扯埋去，痛罵死女包「生舊叉燒好過生你」！
喂，睇番老鼠平嘅畸屎吖，欺詐破欠基金唔係第一次，而係一次又一次前科纍纍，反映乜嘢呀？反映管理破欠基金嘅愚笨官僚把關不嚴囉，十足十無知少女被茅山師傅呃上床咁戇居。
對於法官將奸商掟入監倉踎三年，勞福局局長張建宗話喎，歡迎今次裁決，認為對僱主有警惕作用。其實計功夫茶話齋，如果張局長勒令愚笨官僚痛改前非，唔好任由破欠基金淪為騙子嘅提款機，普羅大眾納稅人會表示歡迎囉。
即係咁，傻瓜永遠係騙子嘅最佳朋友，偏偏官場特別多腦殘，社會福利署都成日被騙綜援啦。所以咯喎，麻煩笨官自我增值，唔好再好似無知少女咁受騙，醜甩耳仔送燒酒o架！