政情：邱榮光巨型橫額惹投訴
今年立法會選舉參選人數係歷屆之冠，僧多粥少情況下，就連一個靚嘅橫額位都難求。不過，又唔係人人冇靚位做宣傳o架喎，以新界東經濟動力邱榮光為例，近日有人就發現，佢喺粉嶺孔嶺村附近豎立咗一幅巨型宣傳橫額，直頭係遠一遠都睇到嗰隻。
咁巨型嘅宣傳位當然唔係人人有，不過就惹來投訴，話正值打風旺季，咁大型嘅宣傳品，容乜易打風期間會塌落嚟喎。我哋問過邱榮光團隊發言人，佢解釋，團隊每一項宣傳品嘅施工過程絕對合規格，而且佢哋每日都有人巡查，打風期間會拆落嚟，所以一定安全喎。
發言人反過來指控，話佢哋嘅橫額同宣傳品全用黑色環保索帶懸掛，但唔知邊啲人咁得閒，成日將啲橫額拆落嚟亂咁掛，之後同選舉事務處投訴；每次佢哋派人到場檢查，總會發現啲索帶變晒白色普通索帶，足證係畀人陷害喎。到底誰是誰非，選民可能要自行判斷喇！