特首梁振英（CY）之前宣布年撥十億推行無障礙升降機嘅利民措施，勞工及福利局局長張建宗尋日就乘「無障礙勢頭」，即刻落咗去紅磡視察無障礙設施，仲不停為自己面上貼金，盛讚喺自己個局嘅統籌下，無障礙工程已經完成咗九成，過去兩年佢哋做嘅改善工程仲好全面，唔單止達標完成，仲簡直係超晒標添。
張建宗抄襲CY嘅說話，話民生無小事。做到嘢讚下自己都好正常嘅，希望之後佢再做多啲嘢，有機會可以再讚下自己啦。
張建宗尋日落咗去紅磡區視察之後，就如數家珍咁講番佢哋嘅「功績」。佢話過去兩年佢哋用咗十三億，六月尾前已經喺三千五百個地方完成咗九成嘅無障礙工程，政府每個部門更加有一個無障礙主任，統籌無障礙工作。
張又話紅磡邨辦事處整咗低台櫃位畀殘疾人士用，又全面鋪設盲人引導徑，等等。唔知CY要唔要好似打完十號風球之後開表揚大會咁，請佢去禮賓府表揚吓呢？