政情：譚耀宗冇諗過放棄Ben
早排有傳民建聯立法會新界西候選人陳恒鑌（Ben）已被幕後操盤人放棄，集中票源力保另一候選人梁志祥。消息傳出，成個新界西即時震動，Ben尋日就拉埋同樣喺新界西參選嘅黨主席譚耀宗（譚Sir）出嚟，證明冇被放棄，仍然得到支持。
Ben同譚Sir尋日扮廚師，企喺街邊炮製一味「三席入局湯」，寓意民建聯新界西取得三席。Ben先將啲材料放晒入個煲，之後再用把貼上「鐵票」字樣嘅扇扮撥火，譚Sir見到，即刻話：「乜你有鐵票咁好嘅？」搞到Ben勁尷尬，即時澄清要加埋「努力」先夠。
譚Sir尋日承認，今次配票有難度，唔少屯門以外嘅街坊堅持投票畀佢，所以只可以盡力呼籲，但強調至今未諗過「棄保」，會盡力做埋呢十幾日，Ben亦話，棄保消息冇嚇窒佢，嚟緊會增加曝光，提高知名度。新界西候選名單仲有郭家麒、麥美娟、麥業成、田北辰、梁耀忠、李永達、陳樹英、陳強、陳偉業、李卓人、曾健成、何君堯、陳一華。