政情：龐愛蘭唔服「棄」
今屆新界東立法會選舉，九席入面預計建制派可奪四至五席，一班女將鬥餐死，好似民建聯葛珮帆（EQ）、獨立方國珊、公民力量龐愛蘭（Scarlett）等，全部主攻婦女票，但無可能三個都當選。三人中以方國珊形勢較弱，而EQ同Scarlett票源極相似，大家都係依靠沙田做基地。傳聞到投票前最後關頭，建制派將出手發動棄保效應，放棄龐愛蘭，改為力保葛珮帆入局。如果真係咁，唔知Scarlett同佢臨急「嫁入」嘅公民力量服唔服氣嘞。
Scarlett上屆單人匹馬都成功搶到兩萬票，今屆仲有一批公民力量區議員幫手，票源應該無咩問題，但點知佢哋內部評估認為，上屆建制派無女性出戰，Scarlett先可以全吸建制派婦女票，但今屆多位女將混戰，婦女票已被分薄，單靠Scarlett自己可能只得一萬票多少少，就算Scarlett班樁腳地區實力雄厚，最樂觀估計都係灌近兩萬票畀佢，夾埋都只係三萬票。
萬一Scarlett拎住三萬票都贏唔到，結果係拖死同樣係沙田區搵食嘅民建聯葛珮帆，所以有可靠消息話，Scarlett同EQ兩個只能活一個。民建聯呢塊招牌始終係「親生仔」，所以有地區人士相信，如果中聯辦出手發動棄保效應，一定係「棄龐愛蘭、保葛珮帆」。
並非「親生女」 望能創奇迹
但龐愛蘭都唔係等閒之輩，就算有操盤人真係出手勸退都未必就範。因為公民力量深信今仗係「不成功、便成仁」。假如首次掛名出戰都咁快收檔，最終只會被民建聯吞併，所以佢哋都諗住背水一戰，希望創造奇迹。但講到尾，做得建制派，條命已經唔係自己操控，要抗命，又睇你是否可以抗命到底。
新界東嘅候選名單仲有田北俊、張超雄、葉偉明、陳志全、劉慧卿、黃成智、蔡耀昌、范國威、湯家驊、陳克勤、梁國雄、邱榮光、何民傑、梁安琪、陳國強、龐一鳴。