政情：中環出更：朱仲賢夫婦行街搵驚喜
卓妮日前行過銅鑼灣蘭芳道嘅Layette時裝屋，見到專幫城中明星名媛執靚樣嘅星級形象指導郭慶彬（Ricky）喺店內，原來佢係時裝店東主。咁啱知名節目製作公司大舞臺嘅創辦人朱仲賢（Billy）及太太程瑤（Donna）拍拖來到，Donna一入去就急不及待搵靚衫，事關佢經常幫慈善機構籌款，成日要添置新裝出席大小派對，所以特登嚟睇吓有無驚喜。
咪睇靚女Donna好似十指不沾陽春水，其實佢係大舞臺嘅總監，同Billy夫妻檔上陣，將生意搞得有聲有色。去年公司榮獲國際性「最佳企業節目大獎」，今年更加喺跨國集團激烈競爭下，勇奪「年度最佳節目公司」銅獎，為香港企業爭光。打扮得有型有款嘅Billy話，啱啱同太太及兩個囝囝去完澳洲返嚟，當地正值冬天，雖然可以避暑，不過氣溫低至攝氏零度以下都好難受。今次旅程最特別之處係入住夜間動物園兩日，喺寒風刺骨嘅夜晚探訪貓頭鷹等動物，兩個仔玩得好盡興。