政情：中環出更：仁愛堂遠征珠峰
今時今日，如果要大家喺大熱天時下四日冇得沖涼、唔准飲樽裝水，相信都幾難捱。仁愛堂上月舉行極地之旅，一行四十多人遠征珠穆朗瑪峰十六天，遊遍全中國唯一嘅登山學校、西藏三大聖湖之一羊卓雍措湖、世上海拔最高嘅絨布寺、冰川等，期間要實踐「不留痕迹」嘅環保旅遊概念，食完嘅糖紙、用過嘅紙巾統統要帶走，以保育大自然景觀。身為團長嘅仁愛堂總理陳婉珊（Clara）坦言，珠峰之旅辛苦過去南極三倍！
首次登珠峰嘅Clara話，今次旅程真係豁出去，四日內冇得沖涼之下，每日行路七、八個小時都在所不計。上到海拔五千四百米嘅珠峰大本營，唔少團員都出現高山反應，好彩最後所有人都安全登陸。佢笑言最大犧牲係曬黑咗好多，惟有勤敷美白面膜急救。隨團嘅仲有副主席張華強一家，佢話旅程最大得益係減肥，每人激瘦六磅。
胡文新推廣冰上曲棍球
主席黃達東（Dennis）冇隨團去珠峰，不過佢喺香港，一樣實踐環保理念，食飯叫少樣餸，飲宴唔食魚翅，盡量唔飲樽裝水，已經幫到好大忙。南極、北極、珠峰都征服過，Dennis透露下一站會計劃去非洲探險。
今次合和實業有限公司有份贊助珠峰之旅，董事總經理胡文新（Thomas）尋日都有嚟主禮。佢話自己仲未上過珠峰，皆因咁嚴峻嘅旅程籌備需時，唔係話去就去，如果有機會同有時間嘅話，佢都想去吓。熱愛冰上曲棍球嘅Thomas話，依家每星期都會操練球技，間中仲會參加港區比賽。未來佢打算公諸同好，將冰上曲棍球推廣到全港學校，現時喺仁愛堂屬下嘅學校率先開辦課程。
卓妮