嚟緊立法會九龍西直選打破一向男多女少嘅局面，原本四男五女嘅參選比例都算幾平等嘅，但正所謂三個女人一個墟，尋日嘅一個電視選舉論壇就被五個女候選人攻佔。不過，人民力量黃毓民上星期喺論壇佔上風後，搞到其他候選人好似「猶有餘悸」，尋日論壇嘅四分鐘質詢環節都冇人敢挑戰佢，令毓民大呻斯人獨憔悴，仲勁寸五個女候選人泥漿摔角，嚇到啲未結婚嘅男助理都驚咗女人喎。
冇候選人敢向毓民開戰，毓民惟有叫口號打倒偽民主派，而幾位女候選人就互相攻擊。上次論壇就國民教育問題被毓民「秒殺」嘅民建聯蔣麗芸，又被對手考佢鄧小平思想，佢就再次以笑容融化問題。唔知係咪被五女泥漿肉搏嚇親，黃以謙就將國民教育同公民教育混為一談。至於前民主黨黃逸旭就反對「洗腦」，擔心小朋友以為「爹親娘親都唔及民主黨親」，咁都講錯，莫非以前白鴿黨影響得佢好深？出席論壇嘅候選名單仲有梁美芬、林依麗、黃碧雲、毛孟靜、黃以謙、譚國僑。