中環出更：「趙樓神」偷閒行街睇衫
綽號「樓神」嘅長實執董趙國雄向來日理萬機，卓妮喺周日就見到佢一身便服，好悠閒咁喺金鐘太古廣場出現，原來佢唔想同屋企人打牌，所以一支公咁溜出街行商場睇靚衫。不過，佢覺得依家買夏裝嫌快將換季，而購置冬裝又未有咁早，結果都係忍手唔買，但講講吓又話遲啲會忙於應付新樓盤嘅推銷工作，睇怕再冇咁多餘暇行商場。
唱好樓市穩陣
講起樓市，雖然政府已宣布多項房屋政策，但近月樓價升幅仍相當驚人。趙國雄話，樓價上升皆因新樓盤供應不足，喺求過於供嘅情況下，新樓盤一出自然好搶手，向隅者又將目標投向二手市場，導致樓市升幅愈升愈有，若政府加快審批預售樓花同意書，相信會令更多發展項目推出市場，應該可紓緩熾熱嘅樓市。
趙國雄又話，行商場時見到好多本地人購物好疏爽，反映香港嘅經濟環境都唔錯，本地樓市仲好穩陣，咁都攝到位唱好樓市，不愧為「趙樓神」。
卓妮