「3322」，呢個唔係門牌，亦唔係路標，不過，意義上其實都差唔多。無錯，3322係大學收生基本資格，莘莘學子十年寒窗，能唔能夠一仗功成跨入大學門檻，可唔可以快人一步踏上人生坦途，就睇呢幾個數字嘞！
只可惜，世事係殘酷嘅，考唔到呢個成績固之然望大學之門而興嘆，就算考到，亦不能保證入到大學，甚至成績再好啲，一樣有可能被摒諸大學校門之外，前路茫茫，徬徨無助，變成首屆四年制大學聯招下嘅犧牲品。
嗱，首屆四年制大學聯招尋日放榜，綜合各間大學收生結果，考生要入港大、中大同科大，基本上文憑試要考獲五科5級至得，而其他院校嘅收生要求亦遠遠高於3322，咁即係話，中游成績學生要搶灘升上大學，難度分分鐘高過「啟豐二號」登陸釣魚島。
最離譜嘅係，由於今年係首屆四年制大學聯招，莘莘學子慘變白老鼠，喺無過往收生成績參照之下，報讀課程惟有盲舂舂靠估，大批學生搶報「水泡科」，搞到學額大兜亂，結果令成績唔錯嘅學生一樣入唔到大學。好似有一位考生咁，考獲5544，成績夠理想嘞啩，結果居然無大學取錄，焗住報讀副學士，你話幾慘呢！
港府搞大學三三四，文憑試最高評級亦由「揸火箭」變「滿天星」，唉，考生就真係被港府玩到唔生唔死，滿天星斗嘞。以前考生名落孫山，就話前路茫茫啫，家陣就算成績唔錯，一樣徬徨無助，搞到一係大學門前行人止步，一係寧濫勿缺讀水泡科。唔怪得有人話，香港嘅教育制度唔係培養人才，而係扼殺人才！
歸根究柢，年年有大量考生需要面對殘酷嘅出路抉擇，屆屆有大批學生成為教育制度嘅犧牲者，皆因港府縮骨成性，欠缺承擔。文憑試考生有六萬四千幾名，資助學位卻唔夠一萬五千個，僧多粥少，唔愁就假。學校自小教導學生，勤力係成功嘅入門之路，結果二萬幾名學生發憤讀書考到入讀大學最低門檻，卻有萬幾人被摒諸大學門外，咁對寒窗苦讀嘅莘莘學子公平咩？咁嘅教育制度合理咩？香港點搞知識型經濟呀？
咁講啦，係人都知，煲呔曾政府留下嘅教育爛攤子係又多又難o架嘞，但唔代表克服唔到喎，睇新政府肯唔肯大刀闊斧，撥亂反正嘅啫。保釣勇士憑住堅強毅力，終於都成功登島宣示主權啦，港府係咪亦應該攞啲勇氣同魄力出嚟，糾正教育流弊，畀多啲考生可以成功搶灘，登入大學門檻呢？