政情：勞聯撐于燕平追貪曾數
香港撐基層勞工嘅工會何其多，但願意接手處理燙手山芋嘅個案如鳳毛麟角，近日勞工界內就重提咗一件舊事。話說「貪曾」曾蔭權當年擔任財政司司長時，曾與家廚于燕平就超時補償一事對簿公堂，據聞當時冇乜工會敢接于師傅呢宗個案，明眼人一睇就知呢啲工會唔想得罪政府，但勢估唔到最後出手撐于師傅嘅，竟然係立場較為親建制嘅勞聯，認真世事難料。
貪曾同于師傅當年嘅勞資糾紛全城關注，勞聯當年肯接于師傅嘅個案，事前都冇人睇好會有乜成果，點知最後于師傅得償所願獲得賠償，都可算係有意外收穫。不過，勞聯今次仗義幫于師傅都唔係冇手尾跟，因為貪曾出名心胸狹窄兼小器，對呢件事一直心中有氣，有人聽聞貪曾早年拜會勞聯時，仲疑似畀說話佢哋聽，唸唸有辭話自己心入面仲有條刺，慌死冇人知道佢有幾咁小器。
不過貪曾同勞聯嘅微妙關係喺今年七月政府換屆前有突破性發展，因貪曾卸任特首前嘅授勳名單有勞聯領導層獲頒授銅紫荊星章，莫非貪曾臨別秋波時覺悟前非，想為過去嘅小器行為「補鑊」？