政情：學民思潮 踩錯場吊吊揈
以黃之鋒為首嘅學民思潮，近期經常去建制派立法會候選人地頭踩場，尋日輪到去搵西九新動力梁美芬。不過，佢哋似乎冇做足功課，竟然去咗西九新動力嘅舊總部，成班人企咗喺條街度「吊吊揈」都唔知點算，徘徊咗一陣終於去咗梁美芬嘅區議員辦事處，但可惜當事人唔喺度，佢哋兜兜轉轉結果都係摸門釘。
點解學民思潮去錯地方抗議咁(火羅)呢？黃之鋒解釋，因為佢唔得閒，所以交畀班朋友仔搞，點知佢哋喺網上搵咗啲舊資料，所以就去錯西九新動力嘅舊總部。佢哋見唔到梁美芬，惟有將預備嘅黑心拼圖交畀梁嘅助理，希望梁美芬聽到佢哋嘅「心」聲，支持撤回國民教育。至於點解係黑心？因為白色嗰個心整爛咗喎，睇嚟佢哋下次踩場前要做足啲準備先至得喇。九龍西候選人名單仲有黃碧雲、毛孟靜、蔣麗芸、黃毓民、黃以謙、譚國僑、黃逸旭、林依麗。