政情：「保梁局」鄭耀棠入保良局
本身公職多多、早就周身唔得閒嘅工聯會榮譽會長鄭耀棠，最近又獲委任新公職，出任老牌慈善團體保良局嘅顧問局成員。法例規定，保良局顧問局裏面，一定要有行政會議非官守議員坐鎮，棠哥一向支持特首梁振英（CY）施政，被公認係「保梁局」成員，依家可以話名副其實係「保梁又保良」。
棠哥係行會資深議員，經驗同能力冇人會質疑，但咪以為舊人先會被委以重任喎，新任行會成員同樣有機會一展所長。政府尋日刊憲，新任行會成員林奮強會出任另一老牌慈善團體東華三院嘅顧問局成員。眾所周知，林奮強係CY重要智囊之一，由佢同棠哥兩個，分別加入兩大慈善團體，足證現屆政府注重民間慈善工作。
新一屆行會成員大部分都已經一身公職，嚟緊政府仲可能再委任重要公職，就算呢班行會新貴有心有力，但時間安排上又係咪應付得來呢？