中環出更：林D9遊西藏雪頓節
卓妮早幾日講過，有讀者喺周日早上見到前政務司司長林瑞麟（林D9）現身機場離境禁區嘅洗手間內，見佢聚精會神梳靚個頭等上機，但佢一見有人就即做快閃黨拖篋走人，唔知咁急趕去邊呢？哈哈，世界真細小，卓妮竟然喺西藏拉薩見番林D9，原來佢係趁住去英國牛津大學進修神學之前，同太太去西藏玩番轉，參加當地一年一度嘅雪頓節盛會。
西藏雪頓節又稱為吃酸奶節，亦稱拉薩曬佛節，會展示以五彩絲綢織成嘅釋迦牟尼大佛畫像、跳藏戲及過林卡三大內容。卓妮前晚就喺喜瑪拉雅飯店入面，遇到林D9夫婦一邊食飯，一邊欣賞充滿民族色彩嘅雪巴拉姆藏戲團表演八大傳統藏戲，坐正中間位睇表演嘅林D9，仲獲得由人扮演嘅西藏犛牛上前畀佢摸摸牛角，之後又有表演人員為佢送上代表尊敬和祝福嘅「哈達」絲織品，據講係有朋友邀請佢去食飯及欣賞表演，可見林D9退位後仍有支持者。
防範港人 完騷即走
不過，對住西藏人卻之不恭嘅林D9，繼在香港機場洗手間煞有介事唔敢梳頭後，據講佢喺喜瑪拉雅飯店晚飯席間聽見有人講廣東話，即時告知太太有香港人在場，之後見佢都冇同在場嘅香港人打招呼，只係專心睇騷，又攞相機周圍影，一睇完騷就走人，咁當然亦無香港人主動上前同佢打招呼啦！其實林D9點解對港人咁抗拒呢？莫非因為佢為官多年，習慣咗喺公開場合行差踏錯，所以要慎言慎行？不過希望佢唔好被港人打擾咗雅興，如果唔能夠享受雪頓節呢個盛大節日就唔抵啦！
卓妮