不招人妒是庸才，不招人盜是窮鬼。真係冇講錯，係天才先至不斷被妒忌，係富有先至不斷被盜用。
功夫茶到底講緊乜乜東東呢？咪就係講緊死性不改嘅壹傳媒集團囉，呢一個淫賤不能移嘅爛鬼傳媒又侵犯東方報業集團嘅知識產權，旗下免費派通街嘅《爽報》盜用《東方日報》同《太陽報》嘅新聞圖片。雖然抄襲或者剽竊係最大嘅恭維啫，之但係侵權始終係犯法行為，東方冇理由縱容壹淫媒作奸犯科，更加唔能夠任得呢一個傳媒敗類教壞細路，當然採取法律行動追究到底啦。
件事係咁嘅，今年三月十三日，《東方日報》港聞版刊登一則標題為「鄉局慶典上海仔滿場飛」嘅文章，《太陽報》港聞版刊登一則標題為「上海仔與鄉紳非泛泛之交」嘅報道。同日出版嘅《爽報》晚版，一篇題為「江湖飯局又有新版本鄧賀年承認劉夢熊邀約」嘅報道之中，竟然盜用東方刊登於《東方日報》同《太陽報》嘅新聞照片。
東方發現版權受到侵犯之後入稟區域法院，要求侵權者賠償損失。經過東方訴諸法律討公道，《爽報》終於扯白旗跪低求和，向法庭繳存二萬零一元作為「附帶條款付款」，並且支付三萬五千元律師費。
大家估唔估到壹淫媒過去侵犯過東方幾多次版權吖嗱？坐穩喇，聽實呀，唔好嚇到傻咗，答案係十七年以來有四十八次之多，對上一次係二○一○年二月。香港城市大學專業進修學院學術統籌宋立功話齋，《爽報》使用他人獨家照片嘅做法明顯不當，每家媒體都利用自己資源同努力報道新聞，冇理由奪取別人辛勞所得。
唉，淫賤黎創辦嘅壹淫媒唔慌有道德啦，有道德就唔會日日誨淫誨盜，將《爽報》辦成一份大灑鹽花嘅鹹報，你只可以同佢講法律，講道德等於對牛彈琴。
最離譜嗰次係一九九六年，《蘋果日報》娛樂版盜用當時東方旗下刊物《東方新地》刊載嘅「王菲懷孕乘飛機」獨家照片。九七年四月《蘋果》被判敗訴，法庭竟然懲罰東方，要替《蘋果》支付巨額堂費，東方上訴至終審法院先至得直。
人哋又要威，又要戴頭盔，《爽報》又要威，又要即跪低，擅自使用東方照片吸引讀者眼球之後不得不扯白旗投降，你話係咪犯賤吖？
呢個壹淫媒都係死性不改o架嘞，計功夫茶話齋，如果仲有下一次侵犯版權，或者違反《淫褻及不雅物品管制條例》，麻煩法官大人唔好再包庇縱容，否則淫媒亂港只會無日無之！