政情：王國興落北角打告急牌
立法會選舉香港島選情好緊湊，最好睇嘅莫過於民建聯鍾樹根同工聯會王國興嘅建制派爭位。重返香港島出選嘅王國興，尋日直接踩入北角向班福建幫街坊拉票，雖然工聯會上屆無派人喺香港島參選，但王國興做過東區區議員同市政局議員，所以班北角街坊聽到佢返老巢勁開心。王國興公開呼籲，叫上屆投票畀民建聯嘅工聯會支持者，要盡快歸隊，睇嚟為咗選舉，連自己人都冇偈傾。
民建聯喺○八年香港島直選，爭少少票先搶到兩席，令福建幫阿姐蔡素玉飲恨，今屆該黨換上知名度較低嘅鍾樹根，面對高知名度嘅王國興搶票，呢場仗真係好難打。
尋日王國興仲請埋參選超級議席嘅「票后」陳婉嫻去北角街市拉票，仲同班街坊講自己告急，呼籲一定要支持工聯會，如果鍾樹根依家仲係咁老定，諗住靠東區票源就贏到議席，咁就要認真諗清楚前路喇。
香港島參選名單仲有單仲偕、葉劉淑儀、劉健儀、勞永樂、劉嘉鴻、吳榮春、陳家洛、吳文遠、何秀蘭及何家泰。超級區議會議席參選名單仲有劉江華、李慧琼、何俊仁、涂謹申、馮檢基及白韻琹。