政情：泛民計錯數 KK勢危
各黨派都覬覦今屆新增嘅五個超級區議會議席，按照「六四黃金定律」，泛民主派理應取得三席，但有分析指泛民第三席勝算一般，皆因佢哋疑似「漏招」計錯數，無計到超級議席與傳統功能界別議席只能「二揀一」投票嘅問題。據聞當中至少涉及十萬泛民鐵票自動蒸發，連同激進泛民票源嘅流失，呢個骨牌效應勢必玩殘矢言等泛民「過票」支持嘅民協馮檢基（KK），阿基嘅選情睇怕真係凍過水喇！
超級議席共有五席，以全港作為選區，泛民同建制派都力爭「坐二望三」，坊間一般相信最後一席將會係KK同民建聯李慧琼（Starry）之爭。不過，有熟悉選情嘅建制派人士分析，爭取以最後一席入局嘅Starry如無意外會順利當選，因為泛民疑似計錯數，無計到泛民喺超級議席同傳統功能界別票源重疊嘅問題，因為超級議席係政改方案新增嘅功能界別產物，如果選民喺超級議席投票，就不能再喺其他界別投票。
白鴿自保 唔會過票
該名建制派人士分析，粗略估計要贏出超級議席，至少要有廿五萬票先至十拿九穩，但泛民未選前已自行蒸發鐵票，因為教育界、社福界及會計界等逾十萬死忠泛民支持者要留喺本身功能界別內投票，因而冇得投超級議席。
再者，激進泛民支持者對民主黨（白鴿黨）同民協支持政改方案一直心中有氣，如果五大選區都有百分之五激烈泛民唔投超級議席，呢個選民數目都唔細，爭取連奪兩席嘅白鴿黨喺票源吃緊嘅情況下，為求自保根本冇可能過票甚至補送KK入局，同KK民調叮噹馬頭嘅Starry自然漁人得利，勝算勢必看高一線。
講到底，選舉就係人力同資源嘅比併，KK冒住滅黨危機都要選超級議席，如果最後因為泛民計錯數而要同議席擦身而過，到時認真喊都無謂喇！