中環出更：蘇家碧現身 未願「歸位」
香港工業總會總經理、前商務及經濟發展局副秘書長蘇家碧（Linda）返新工未夠兩個月，尋日首次現身公開活動，為職業訓練局塑膠材料資源中心開幕禮做主禮嘉賓。Linda笑稱，再就業「冷河期」到年底就結束，到時未必即刻坐正做工總行政總裁（CEO），事關輪流幫佢頂更做埋對外工作嘅工總主席鍾志平及副主席劉展灝（Stanley），如果想做多陣「署理CEO」嘅話，就畀佢哋過足癮喎！
劉展灝樂做「署理CEO」
咁啱Stanley一齊出席同一場合，佢話幫Linda做對外工作一啲都唔困身，好似啱啱就同一班鐘錶界老友親臨英倫欣賞精彩賽事，仲睇埋閉幕禮至返港。講番塑膠材料資源中心成立，負責統籌嘅係香港塑膠業協會主席黃可嘉，佢係前中華廠商聯合會會長黃友嘉嘅哥哥。
一眾工業界名人力撐塑膠並非魔鬼，事關只要人類繼續提煉石油就免不了產生塑膠，塑膠普遍應用於玩具、家電及鐘錶等行業，其實對工業影響好大嘅。
卓妮