中環出更：莊家彬極速考牌 愈潛愈深
炎夏最好出海暢泳，莊士集團太子爺莊家彬（Albert）都趁假期飛去馬來西亞詩巴丹（Sipadan）進修潛水技巧，極速考獲高氧潛水牌，進軍深度潛水。時興考取潛水教練牌，Albert就笑言唔想爭食，寧願攞番個潛水拯溺牌，助人又助己喎。
活躍好動嘅Albert，十四、五歲已考獲潛水牌，其後去美國讀書，興趣暫時擱置，直至今年初再重拾嗜好，一玩就「發晒燒」，短短一年間潛遍布吉、菲律賓小島及沖繩。早前佢就約埋人稱「靚仔醫生」嘅莫樹錦，一齊去著名潛水勝地詩巴丹，嗰度出名水質清澈，海龜、鯊魚隨處可見，更可探索沉船遺骸。
水底做實驗 好玩過癮
Albert夠膽大，一度潛到水深約三十七米，感覺好刺激，但若要數最過癮嘅，仲係喺水底做實驗。話說早前佢喺網上見有人帶生雞蛋下潛十多米，然後打爛蛋殼，剝走蛋白，此時蛋黃因為壓力緣故，喺水中載浮載沉，十足乒乓波一樣。Albert一於照辦煮碗，果然好玩又過癮。佢仲趁機上埋高氧潛水班，話咁易Pass埋，教練都讚佢叻仔。
卓妮