嘩嘩嘩！好勁呀！港鐵上半年盈利雖然同舊年比較下跌三成幾，不過仍然賺錢五十八億六千一百萬元，牟利能力之高簡直神乎其技！
講到賺錢能力，港鐵真係好鬼死架勢，舊年之嘛，狂賺一百四十七億元，淘古井致富嘅風水鴨神棍都望塵莫及。之不過咁，賺錢能力高唔代表擁有社會責任感，於是乎港鐵愈來愈似一間無良掠水公司，將乘客當作羊牯咁劏。劏羊牯嘅具體辦法係加價加價再加價，服務質素就停滯不前甚至人衰行路打倒褪。港鐵今年六月先至勢兇夾狼加價百分之五點四，激到肉隨砧板上嘅小市民生蝦咁跳，即使有人示威抗議都當透明。
港鐵上半年繼續狂賺錢，大拿拿五十八億幾落袋，有冇機會良心發現回饋乘客呢？望係咁望啦，不過香港人好命苦o架，回歸十五年以來對住一個漠視民意又官商勾結嘅特區政府，好衰唔衰特區政府係港鐵最大股東，要求港鐵票價可加可減直情難過神舟飛船載人去火星。
港鐵嘅服務質素有幾低呢？冇耐之前嘅一個上午繁忙時段，三條市區路線包括荃灣線、觀塘線以及港島線全部跪低，死因係車務控制中心顯示系統冇電力供應，未能以電腦調動列車，要改用輔助系統指揮，導致三條路線列車班次延遲。死機期間大批上班一族滯留月台呆等，大部分乘客比平日遲半粒鐘到達目的地。事件擾攘超過三小時，受害乘客百萬計。
喂，錢就賺咗，價又加咗，畀少少決心改善服務質素得唔得？久不久就整一劑乘客滯留月台，玩死人咩！
有一單嘢更加搞鬼，無良掠水公司唔止玩死乘客，連大自然嘅樹木都唔放過。港鐵為咗興建南港島線，喺黃竹坑地盤斬咗兩棵大樹嘅主要樹枝，只餘小量枝幹，嚴重危害樹木健康。關注團體「龍虎山自然面貌關注組」向政府投訴港鐵不當斬樹，結果地政總署向港鐵罰款接近五十二萬元。
其實呢，港鐵連累大量樹木壯烈犧牲都唔係第一次o架喇，除咗興建南港島線要斬四千棵樹之外，觀塘延線工程又害到何文田一千棵大樹灰飛煙滅，當然引起熱愛綠色生活嘅街坊街里狂插啦。
運輸及房屋局局長張炳良曾經講過，港鐵票價調整機制將於本年底至明年初完成檢討，正聘用顧問公司全面檢視，研究是否有必要加入反映港鐵成本、盈利水平、市民負擔能力等等元素，甚至加入「服務質素」作為票價考慮。
計功夫茶話齋，研乜鬼嘢究吖，如果特區政府真心誠意信奉「民生無小事」，票價考慮兩個字講完：減價！