最近國民教育議題搞到全城鬧哄哄，連神州九號航天員訪港都有人走去示威、抗議「洗腦」。國家奧運金牌運動員下個星期五就會訪港三日，到時佢哋又有示範表演，又會同青少年見面交流，到時唔知會唔會又有人抗議話班運動員係嚟幫年輕人「洗腦」。民政事務局常任秘書長楊立門就似乎好淡定，佢尋日喺記者會度就話，今屆國家運動員攞到好成績，相信市民都會好歡迎佢哋嚟香港，就算佢哋訪港係國民教育，都會係成功嘅國民教育喎。
