○八年立法會選舉前夕，立法會資訊科技界譚偉豪（Samson）喺收費電視豪使廿二萬播放宣傳短片《IT達人Talk》，最後以卅五票險勝對手莫乃光。莫乃光喺選舉結束後入稟法院提出選舉呈請，質疑Samson違反選舉條例，雖然最後Samson可以保住議席，但就搞到佢今屆唔敢再喺電視大賣廣告，拍完宣傳短片後淨係放上分享網站YouTube算數，名副其實見過鬼都怕黑。
莫乃光自稱係今屆特首選委選舉「票王」。重遇宿敵莫乃光，選情「五五波」嘅Samson繼續拍片大晒往績。比起上次燒銀紙爭曝光，Samson今次嘅「有問必答」短片簡直係屬於蚊型製作。皆因Samson會喺網上收集網友提問，搵義工拍片後再用電腦軟件剪輯短片兼放上網，成個製作費一千蚊有找。Samson賣關子話遲啲會推出同選舉有關嘅手機程式，但就不斷強調所有宣傳均以低成本製作，睇黎呢單官司喺佢心中仍然留下唔少陰影。