政情：醫學界候選人鬥斯文
爭取連任嘅立法會議員梁家騮同醫學會會長謝鴻興尋日再度出席電台選舉論壇，可能因為醫生論政唔鍾意粗聲粗氣，尋日論壇駁火位仍然欠奉。梁家騮同謝鴻興兩人一唱一和，唔講唔知兩人原來係打生打死嘅競爭對手。雖則兩人嘅政綱同醫療立場幾乎一致，但兩人對「平反六四」取態截然不同，梁支持平反但謝就有相反嘅意見。
喺尋日嘅論壇上，有聽眾話喺公立醫院輪候兩年都未做到白內障手術，梁家騮即刻斬釘截鐵咁話：「好簡單，瑪麗醫院無輪候時間，去瑪麗即刻有得做。」謝鴻興就和應話「係囉，由沙頭角去瑪麗做手術都好平常啫。」
至於醫護人員工時過長，梁家騮話會支持立法制訂標準工時，謝鴻興亦都舉腳贊成，又鬧爆醫管局壓迫實習醫生做廉價勞工係罔顧僱員權益。
謝鴻興今次參選擺明係挑戰梁家騮，但佢仍然拒絕批評梁家騮四年功過，搞到梁家騮要反問謝鴻興係咪已經數夠票。謝鴻興解釋話佢唔想因選舉損害人格。總之醫學界嘅選民都好難揀支持邊個。