政情：蔣介石青天白日勳章港拍賣
已故台灣總統蔣介石遺物有價，一枚佢佩戴過嘅青天白日勳章，八月尾會喺香港拍賣。據知呢個勳章係全球唯一一枚，一直屬私人收藏，由於好珍貴，估價高達三百萬至五百萬港元。
首次喺拍賣會上曝光嘅勳章，保存得相當完好。由於佢背後充滿歷史價值，係歷史文物，拍賣行將在競投前舉行預展，畀公眾一睹佢嘅風采。青天白日勳章係喺民國十八年設計，即一九二九年，奠都南京嘅國民政府將佢定為軍中最高勳章，代表至高榮譽與無上價值，陸海空軍官佐士兵因抗禦外侮而立下卓著戰功者，先可獲得頒贈。
一九三○年，國民政府將佢送畀時任國民政府主席嘅蔣中正上將，即係蔣介石，佢一見傾心，成為佢最早佩戴嘅勳章，亦係佢最喜愛嘅勳章。
此章背面刻有「特壹」兩個字，實屬獨一無二。