政情：劉健儀 王國興 鍾樹根 三個只能活一個

選舉開始初期，部分建制派人士都認為，由於港島區嘅泛民候選人實力唔強，建制派要喺七席中搶四席並唔係無機會，即係有信心打破泛民同建制六比四嘅黃金比率。但最近建制派中人發現，泛民除咗民主黨單仲偕、工黨何秀蘭同公民黨陳家洛勝算較高外，連人民力量劉嘉鴻嘅走勢亦愈嚟愈強勁，擔心比例代表制下可以成功突圍而出。

未來兩周定奪 盼搏出成績

據聞建制派最初盤算入局嘅四人係民建聯曾鈺成、新民黨葉劉淑儀、王國興同鍾樹根，根據佢哋嘅構想，民建聯鍾樹根同曾鈺成分別攞港島東同西嘅支持，宣傳上亦有咁嘅策略，但操作上先發現困難重重，先有唔少民建聯樁腳抱怨，話就算曾鈺成夠贏一席之後有大量剩餘票，都好難全數過畀知名度極低嘅鍾樹根，第二係王國興同鍾樹根嘅票源非常相似，大家都係喺東區搶票，好難分得勻。至於自由黨劉健儀嘅支持度亦開始上升，亦都唔係輸得晒，形成三人激鬥嘅局面。

所以近期已經有人向建制派放風，話有關人士當然想力保四席，但若然最後建制派無法穩取第四席，操盤人或會發功將所有票源押喺一人身上，寧願穩守三席，都唔想出現乜嘢意外。有地區人士就收到風，話有關人士現時仍准許一眾建制派候選人各自爬山，未有出手勸退任何人，但投票前兩周會有所定奪，所以目前大家都搏命做出成績，冀望操盤人嘅「祝福」落喺自己身上。

港島候選人仲有許清安、勞永樂、吳榮春、吳文遠同何家泰。