中環出更：陳文綺慧行善 帶頭食得慳
百物騰貴，打工仔食餐午飯，隨時使一張「紅衫魚」，所以善用飯錢，可以幫到唔少人。東華三院主席陳文綺慧（Viola）日前發起「善膳一心」（Skip A Lunch Day）行動，呼籲成班東華員工，每人捐出一頓午餐費五十元行善。佢期望全港公司加入行列，發揚愛心企業精神。
咁有意義，員工捐得好爽手。上周五齊齊將錢入落捐款箱，單係總部，已有逾二百位員工舉腳支持，目標係籌三萬元。善款將用喺東華社區飯堂「善膳軒」舉辦暑期烹飪班，等班基層兒童享受一個歡樂暑假，預計將有數十名兒童受惠。
但Viola怕員工唔食晏，餓到暈，就即場每人派一份「輕怡午餐包」，內有一個橙及幾包餅乾，夠頂肚嘞。至於佢自己已帶頭唔食晏。佢笑言當上主席後，忙到食晏都無時間。不過一有空檔會走去跑馬地祥興茶餐廳，整番件鮮油多及奶醬多，再加杯奶茶。咁有「本錢」食肥啲，認真羨慕死人。