中環出更：電子大王遊勻歐洲
要短時間內遊歷多個地方，坐郵輪確係唔錯嘅選擇。卓妮日前去帝苑酒店間日本餐廳稻菊食晏，遇到「電子大王」周振基（Stephen）同好少露面嘅周太Rita。原來即將接任潮州商會會長嘅佢，趁仲有空檔，當晚就同太太坐郵輪歎二人世界，佢哋先飛倫敦逗留數天，再坐上「翡翠公主號」，去勻丹麥、德國、愛沙尼亞、俄羅斯、瑞典、芬蘭，玩足十八日先返港。
Stephen經常都嚟「稻菊」開餐，事關囝囝周博軒（Felix）從小就愛食日本菜，依家Felix成家立室，娶咗賢妻柯立珍，仲誕下三個可愛乖孫，一家七口仲不時喺呢度聚餐。
當日Stephen大擦鐵板燒牛肉，仲有炸得薄脆嘅天婦羅，加埋個飯粒分明嘅日式炒飯，食飽飽先上機。Stephen話，自己每年都會去好多次旅行，梗係啦，平時工作壓力大，唔去吓旅行減壓點得呀？
跳排排舞 揮走脂肪
唱粵曲係Stephen最愛，既可抒發感情，又學到中文，何樂而不為？受丈夫感染，Rita都向粵劇名伶林家聲拜師學藝，Stephen大讚老婆天分更高。不過講到跳舞，Stephen就掉番轉向太太學習，近日開始跳排排舞，希望揮走脂肪喎。Stephen忙商會就職，Rita就弄孫為樂。佢哋話，第一個男孫改名做「添泰」，原來有含義，「泰字」上截係「三人」，佢希望抱到三個孫，點知真係夢想成真。
卓妮