九巴漏招 車廂驚現大窿
九巴車廂零件未有妥善安裝，乘客擔心影響行車安全。黃先生早前乘搭九巴由尖沙咀返回屯門，發現車廂通道有零件未有妥善安裝，乘客可在車廂內看到車軸及內部零件，「喺車入便有咁大個窿，仲可以睇到車軸同地下，乘客唔小心差錯腳或者跌咗嘢落去實會發生意外！」
九巴發言人表示，已為有關巴士進行詳細檢查，並已裝回有關檢視蓋零件。檢視蓋零件設於車廂下層近車尾通道兩旁，用以檢查底盤機械組件。雖然是次情況不會對行車安全構成影響，但九巴已對相關職員作出紀律處分，並會加強檢測，避免同樣情況再次發生。
「今次就話唔影響行車安全啫，但佢哋咁唔認真檢查車輛，下次甩咗重要組件就搞出人命！」黃先生不滿九巴職員未有仔細檢查車輛便讓車輛在馬路行駛，認為事件為職員疏忽所致，促請九巴職員在行車前認真為車輛檢查。