政情：房委會翻閹劉國裕黃遠輝
政府尋日委任學者劉國裕、銀行家黃遠輝做房屋委員會委員，任期兩年，填補做咗運輸及房屋局局長嘅張炳良、審計署署長孫德基，呢兩位房委會前委員嘅空缺。黃遠輝仲好大機會做埋房委會資助房屋小組委員會主席添，負責居屋同公屋政策，責任重大。其實兩人都做過房委會委員，今次係「翻閹」，唔通搵人做公職真係咁難？搞到房委會來來去去都係嗰班人。
劉國裕係城市大學公共及社會行政學系副教授，早喺九六年加入房委會，○二年做夠六年就離任。世事難料，可能連佢自己都估唔到十年後可以重返房委會。劉國裕有得「翻閹」，除咗因為對房屋問題瞭如指掌，亦可能因為張炳良當年做城大公共及社會行政學系系主任時，同佢做過舊同事有關。
至於工銀亞洲前董事黃遠輝喺○五年做房委會委員，去年先離任，期間做過房委會財務小組委員會主席，離任一年就「翻閹」，速度相當快。喺銀行界打滾近四十年嘅黃遠輝講過，細個時住木屋，後來入住徙置區、廉租屋，可謂房屋政策嘅受惠者，所以加入房委會，希望盡綿力回饋社會。