古人話「自作孽，不可活」，但自作孽後都冇自省就更加不可活，講緊嘅係公民黨（公文袋）。公文袋梁家傑（袋巾傑）尋日出席選舉宣傳活動時，就批評港府喺干預選舉上做咗好大動作，而且好多街板位讓晒畀超級區議會議席嘅候選人，令有關候選人可以同地方直選嘅候選人「孖公仔」掛街板宣傳，對於佢哋冇參加超級議席嘅政黨就好唔公道喎。不過，當初係公文袋唔畀黨員司馬文參選超級議席，莫非袋巾傑失憶？
超級議席係新玩法，要騰出街板位置畀有關候選人宣傳亦理所當然，遊戲就係咁玩，只係公文袋當初同民主黨大搞密室政治協調選舉，唔畀黨員司馬文參選超級議席，仲逼到人哋憤而退黨。該黨自願放棄參選權利，依家袋巾傑反而怪責政府大細超對待候選人，唔知邊個唔公道呢？只能夠話係該黨自食其果。九龍東候選名單仲有胡志偉、黃國健、陳鑑林、陶君行、黃洋達、謝偉俊、譚香文、嚴鳳至。