政情：教局副局長人選臨門有變
新政府多個政策局仲未公布副局長人選，原本保安局局長黎棟國日前話等多一、兩日政府就會公布，點知係放流料。據講教育局副局長人選喺最後關頭都出現變卦，原先嘅熱門人選、現任教育局副秘書長陳嘉琪，據講已經唔喺名單上面，但相信另覓人選唔係一頭半個月可以搞掂，睇怕局長吳克儉喺國民教育科風波上，要獨力迎戰班學生同家長。
早前政府安排副局長人選面試，陳嘉琪都有到場，大家以為佢一定做硬教育局副局長，點知依家教育局變咗熱廚房，日日畀班學生、家長狂插，副局長呢個位唔係人人啃得落，唔知係陳嘉琪未夠班，定係佢想留守原職，主力為新學制課程檢討工作？總之依家佢唔再競逐副局長嗰位，事到如今，教育局要再物色過適合人選。
本身係人力資源專家出身嘅吳克儉，對於請人有一套理念，寧願慢慢請，都唔想求其搵個人頂上。吳局長話，副局長唔一定要公務員出身，但最好有一定教育經驗、有理想、有遠景，仲要同教育局上下、學界夾得嚟先得，咁有要求隨時到年尾都未有着落，但佢話唔緊要，要請啱人嘅話，少啲耐性都唔得。