政情：選舉論壇策略 一語中的
立法會選舉已進入埋身肉搏階段，電台同電視台都開始舉辦選舉論壇，讓候選人自由搏擊。不過，今屆選舉區區混戰，尤其係新界東同新界西，各有十幾廿條名單出選，為咗避免有觀眾投訴，電台同電視台一致決定選舉論壇時間最長只可以播放兩小時，扣除廣告時間，每條參選名單嘅發言時間真係所剩無幾，分分鐘淥個杯麵嘅時間就冇咗。候選人為咗講嘢要一語中的，已諗好計仔出盡法寶，期望喺幾分鐘內突圍而出。
要快而準交代政綱
新界東直選共有十九張名單，民建聯陳克勤話，會把握時間介紹自己嘅政綱，因為主動鬧人唔係佢嘅作風，但為免被對手問到口啞啞，佢除咗會搵啲同事一齊練習，接觸多啲尖銳嘅政治議題外，仲會請個演藝學院老師惡補，教佢點樣加強身體語言表達喎。公民力量龐愛蘭話，咁短時間內好難鬧晒十八個對手，所以應該會留番啲時間嚟介紹自己，但係有需要時唔排除會加入戰團鬧幾句。咁有乜撒手鐧呢？佢就懶神秘話係秘密，星期日會同競選團隊去練兵。
至於有十六張名單嘅新界西直選，人民力量陳偉業就好有經驗話，到時點回應要睇吓氣氛，仲要睇埋自己嘅形勢，如果勢危，可能要告急。不過，如果對手攻擊佢先，就冇理由翹埋雙手唔反擊喎，但佢話新界西嘅選舉論壇較遲開始，所以要睇埋其他參選團隊嘅調子再決定辯論策略。
至於工聯會麥美娟就會想辦法令競選團隊搶眼啲，加深觀眾嘅印象，但講到底最重要都係快而準交代所有參選政綱。總結上述幾位參選人策略，個個主要先顧自己嗰瓣，睇嚟都幾難擦出火花。
新界東候選名單仲有張超雄、田北俊、葉偉明、陳志全、劉慧卿、黃成智、蔡耀昌、范國威、湯家驊、葛珮帆、梁國雄、邱榮光、何民傑、梁安琪、方國珊、陳國強、龐一鳴。新界西候選名單仲有譚耀宗、陳恒鑌、梁志祥、郭家麒、麥業成、田北辰、梁耀忠、李永達、陳樹英、陳強、李卓人、曾健成、何君堯、陳一華。