公民黨高層涉蠱惑收租

公民黨每月交約三萬元租金

公民黨於○九年起搬往位於北角屈臣道海景大廈B座二樓一個單位作為黨總部，並對外宣稱該單位是一名「支持者」持有，再以「友情價」租予該黨。但原來該單位是由「公共事務調研中心有限公司」於○九年以八百五十萬元購入，根據公司註冊處資料，該公司先後發行共四十五股，已發行股份面值為八百八十萬元。公司大股東為余若薇，有二十三點五股，即佔超過五成二的股權，其次是持有六股的公民黨成員關信基，有五股的資深大律師張健利等，梁家傑及湯家驊則各自持有一至兩股。

公民黨每月須向該公司繳交約三萬元租金，以股權分布計算，余若薇每月可得逾一萬五千元，前後租用約三年來共得約五十四萬元。三名身兼立會議員的股東當中，余若薇及梁家傑分別於一○年及一二年向立會申報有關股份利益，但湯家驊則至今都沒有申報。

湯家驊被揭沒向立法會申報公司股份利益。	梁家傑稱公司向公民黨收取的租金，至今未動用。（鄧湄攝）	余若薇透過公司持有黨總部逾五成股權。

湯家驊：諗都冇諗過要申報

梁家傑昨日解釋，該黨過往租用的灣仔單位○九年被大幅加租，數名黨員及支持者決定「夾份」在海景大廈購買單位作為總部，再由該黨租用。他聲稱公司所得租金「仲喺度冇用過」，且每年都在會員大會交代。湯家驊承認向立會漏報利益，稱當初只想到支持該黨，「諗都冇諗過要申報股份」，又指「如果有人提我一定記得報」。至於總部明明由黨高層持有，為何仍要交租？他推說：「因為有外人喺度，大家都知道要交租。雖然外人都支持公民黨，但都希望物業有可以收租保值。」

海景大廈	公民黨○九年將總部遷往北角海景大廈，並對外宣稱是向「支持者」租用。（資料圖片）	放大圖片

余若薇則說，記憶中該黨的說法並非說「只有一名支持者」購買，辯稱黨高層也是支持該黨，死撐「話支持者買都冇錯o架」。她又指黨員都知悉購買物業作總部及需要交租，不存在任何瞞騙，有關租金亦未曾有人「落袋」，僅用作交稅及商業登記等公司支出。

大股東余若薇夾錢逾四百萬

她強調該黨做法與民主黨不同，股東「出咗幾多錢就多股份」，並非於何俊仁及李永達宣稱的「代名人」，她本人當時就夾了四百多萬元，惟她拒絕詳細交代其他不知名股東的身份。

梁家傑已報名參選今屆立法會九龍東直選，同區候選人有胡志偉、黃國健、陳鑑林、謝偉俊、譚香文、陶君行、黃洋達及嚴鳳至。湯家驊則參選新界東，同區候選人有張超雄、田北俊、葉偉明、陳志全、蔡耀昌、黃成智、范國威、劉慧卿、何民傑、陳克勤、葛珮帆、梁安琪、龐愛蘭、方國珊、陳國強、龐一鳴、梁國雄及邱榮光。余若薇參選新界西，同區參選人有梁志祥、陳恒鑌、譚耀宗、麥美娟、麥業成、田北辰、梁耀忠、李永達、陳樹英、陳強、陳偉業、李卓人、何君堯、曾健成及陳一華。

湯家驊回答記者實錄

問：點解其他公民黨立法會議員有申報而唯獨得你漏報？

答：當初係諗住支持個黨，諗都無諗過要申報持有股份，同埋我啲股份好少，如果有人提我一定記得報，但無人提我就唔記得咗，呢個係我自己疏忽，無得賴。

問：係咪故意隱瞞？

答：呢啲唔係咩隱瞞，亦都隱瞞唔到，你知我份人對錢唔係太過上心，如果唔係我都唔會從政啦。

問：總部明明係黨員持有，但多年來一直交租，會唔會覺得奇怪？

答：好多黨員知道有黨員有股份，但因為有外人喺度，大家都知道要交租。雖然外人都支持公民黨，但都希望物業可以收租保值。

問：民主黨同你一樣都係漏報，會唔會覺得佢哋嘅開脫理由令人難以信服？

答：我真係唔敢評論民主黨，亦都唔想評論民主黨，我只係講自己嘅case（個案），係得我一個漏報，要道歉都係我一個要道歉。

問：你有無參與過公司事務？

答：我無參與過公司事務，我無去過開會，亦無人通知我去開會。

問：仲有無其他利益未申報？

答：你哋知道已經係全部實情，已經無其他嘢可以補充。

問：有無見過民主黨幕後金主于品海？

答：我唔識佢，從來無見過佢，亦唔知佢係邊個。

梁家傑回答記者實錄

問：點解公民黨用咗一個同民主黨相似嘅形式去成立黨總部？

答：○九年時，我哋喺灣仔畀人加租，加得好緊要。所以長遠嚟講，我哋想避咗呢樣嘢，幾個黨員同啲支持者就夾份喺海景嗰度買咗個單位。咁多年嚟，我哋都冇加過租，而且喺立法會度都申報咗，不存在隱瞞。至於啲錢點用，我哋會再討論。

問：點解淨係湯家驊無申報？

答：我諗佢自己都答咗，當時喺申報時忽略咗呢一點，但我同余若薇都持有股份，亦都申報咗，完全無隱瞞嘅成分。

問：嗰個單位係唔係買o架？

答：個單位係買嘅，之後我哋再租畀個黨，啲租金嘅事，每年都喺黨員大會上詳細交代。

問：係咪一定要用呢個方法去設立黨總部？

答：因為其實我哋一班十位八位創黨黨員，加埋幾位支持者夾錢買咗個單位，再租畀個黨。除咗呢個方法，我哋諗唔到其他方法。

問：啲黨員係咪知道租金嘅事？

答：係，知道嘅，啲租金仲喺度無用過。我哋有個Audit（核數）記錄低，每月租金約三萬元左右。

余若薇回答記者實錄

問︰點解公民黨○九年會同外界講係由一名支持者擁有總部物業﹖

答︰記憶中唔係話有一個支持者，而且由頭到尾都無轉過。黨員好清楚，我哋搵物業，因為加租加到好貴，交幾多錢租全部清楚，話支持者買都無錯，一個、兩個，都可以話支持者o架。

問︰公司股東嘅持股量係咪等於出咗幾多錢﹖

答︰出幾多錢咪幾多股囉。

問︰你廿幾股即係畀咗四百幾萬﹖

答︰差唔多啦，係咁多。

問︰公司收到嘅租點用﹖有無人自己「落袋」﹖

答︰無用過啲租，(租金收入)無百幾萬咁多。公司有支出，商業登記呀、交稅呀，呢啲都係公司畀，其他錢喺公司戶口。

問︰湯家驊話有人希望可以收租保值，無人自己收番租金﹖

答︰因為唔係淨係黨入面嘅人，真係要用(租金收入)要開會大家討論。

問︰可唔可以詳細交代吓股東嘅身份﹖

答︰我都唔係全部知邊個，公司註冊處有晒名，你自己對囉。