政情：黃英豪囡囡喺NBA打工
二○一二倫敦奧運會各個項目舉行得如火如荼，「奧運熱」繼續喺政商界蔓延，除咗捱眼瞓睇比賽以示支持外，全國政協委員、金至尊主席黃英豪（Kennedy）喺推廣體育更加自成一格，除咗旗下集團連續多年贊助本地籃球邀請賽外，佢嘅囡囡一畢業就喺NBA亞太區辦事處做項目主任至今，Kennedy成家同籃球認真有緣。
Kennedy早前喺記者會上話，旗下集團連續第三年贊助籃球邀請賽，特別設計大賽標誌同推出兩款全新籃球狂熱銀飾系列配合，除此以外，Kennedy自己都身體力行支持籃球運動，據聞佢知道NBA季前熱身賽有幾場會喺內地舉行，一早買定晒飛諗住到時可以捧場。
同場出席活動仲有身兼籃球總會會長嘅福建社團聯會榮譽主席李群華。對於政圈盛傳得「福建幫」支持，港島區嘅議席就手到拿來，李群華以今日係籃球活動為由，唔願意評論同多講「福建幫」嘅取態，反而自爆曾經同特首梁振英講過，推廣運動係最少成本令社會和諧喎。