中環出更:肥亨金勞詹勝負難分

前經濟及商務發展局局長馬時亨(肥亨)退出官場幾年,但同無論係現任定前任嘅官場、政界朋友都有保持聯絡,其中一人就係「金牌莊家」詹培忠。原本報咗名喺立法會金融服務界角逐連任嘅金勞詹參選完又退選,原來佢同肥亨就是否參選賭咗一舖,邊個輸邊個贏,都好難講得清楚。

話說喺一個飯局上,金勞詹拋出話自己唔再選,肥亨就好冷靜咁答佢︰「選唔選唔到你話事。」「莊家」即時賭癮起開盤︰「我唔選的話,你輸兩圍。」結果詹培忠宣布參選,即係輸咗,後來又決定退選,又贏番。

肥亨嘅另一老友就係上個月至退休嘅前保安局局長李少光。肥亨有日同李少光講︰「等你退咗休,我同你打勻世界各地嘅球場。」果然,光哥六月卅日掛靴,肥亨即時訂定機票BOOK定球場,佢哋此行飛咗三個國家,十四日裏面打咗十一個球場,由加拿大Alberta省四個球場開始打起,再征服紐約三個球場,最後攻佔埋蘇格蘭四個球場先肯收兵。光哥仲喺紐約一個有一百二十四年歷史嘅私人球場Saint Andrew's尋到寶,喺更衣室發現紐約巿長彭博個locker,為官時一眼關七嘅光哥,估唔到退咗休都仲咁好眼。

打賭參選 純粹聯誼開玩笑

詹培忠宣布唔選嗰陣,肥亨仲揮緊桿,早幾日見肥亨「過境」返嚟飲玩具大王蔡志明嫁女嗰餐,卓妮問佢幾時同金勞詹計數,佢話自己純粹係同老友聯誼開下玩笑,加上佢哋打賭誰勝誰敗呢次打賭嘅內情好複雜,真係要計的話要上法院先解決定到,所以肥亨決定由佢做東,可惜佢專程由英格蘭返嚟飲完又要即飛北京開會,所以都唔得閒搞住,要交由朋友安排,仲未知幾時開飯。

卓妮

第一手消息請下載on.cc東方互動iPhone/iPad/Android/Windows Phone Apps

搵樓18即睇最新樓價走勢、最全面地產新聞及筍盤情報