中國製造嘅國產奶粉就話得人驚啫，隨時內含化學物質三聚氰胺，飲到一個二個小嬰兒變晒腎石寶寶，受害家長走去討公道又被屈成「尋釁滋事」，跟手掟去踎黑獄。勢估唔到嘅係，依家連日本奶粉都有問題。
食物安全中心抽驗市面十四款嬰兒配方奶粉樣本，檢測三十三種營養素，發現六個樣本碘含量偏低，其中來自日本嘅和光堂同森永初生嬰兒奶粉，如果按照兩個品牌所建議嘅餵奶量，碘攝入量少於世衞標準三分一，估計一千名香港嬰兒受影響。碘含量低有乜問題呢？有可能影響嬰兒甲狀腺功能，不排除影響腦部發育。
對於日本奶粉發現問題，食物及衞生局局長高永文就話嘞，家長應該轉換奶粉或者轉用母乳，若然家長認為有需要，可以去指定嘅母嬰健康院為嬰兒驗血。高永文仲話，國際上對嬰兒配方奶粉嘅碘含量有不同要求，要進一步研究是否確實會影響健康，雖然今次涉及嘅樣本屬於和光堂同森永初生嬰兒奶粉嘅一個批次，但係建議停用有關產品所有批次。
唉，奶粉奶粉，又係奶粉，點解問題奶粉咁鬼多o架？國產奶粉出事已經害到本地媽媽好頭痕，事關內地同胞瘋狂來港搶購外國奶粉，港人子女陷入斷奶危機，一個唔覺意搶購失敗都唔知點算好。家陣再整多一劑日本奶粉出事，功夫茶想問負責把關嘅衞生官僚，你哋係咪打得少？
再講吖，日本政府都責無旁貸喇。喂，日本製造被視為信心保證，貨物出口賣到外國之前唔係應該有嚴密嘅品質檢查嘅咩？碘含量少於世衞標準三分一都夠膽死，靠害咩！
咦咦咦，咪住先，會唔會真係存心靠害o架？你知啦，中國同日本牽涉糾纏不清嘅國仇家恨，話唔埋劣質奶粉係一種另類侵華武器。
點都好啦，食物安全中心實在應該打屁股，事關過往原來係冇檢測碘含量o架，今次係破天荒第一次，而且係誤打誤撞，無心插柳嘅咋。換句說話講，已經過咗嬰兒期嘅你，有機會係飲呢一類劣質奶粉長大嘅，腦部發育受到影響都懵然不知。計功夫茶話齋，高永文最好安排食衞局仝人集體驗血，睇下愚笨官僚把關不嚴嘅原因係咪細細個飲咗含碘量少嘅劣質奶粉。
講真吖，功夫茶對高永文局長的確有期望o架，因為前任局長周一嶽實在做得太差，搞到香港醫療同衞生問題層出不窮，淨係藥物監管不力已經嚇死人啦。所以咯喎，麻煩高局長打醒十二分精神，唔可以再任由日本或者其他國家生產嘅劣質奶粉殺入香港，如果唔係，家長唔會放過你o架！