前立法會議員吳亮星（星爺）歸隱政界多年，最近轉戰立法會金融界自動當選，仲講明話要好似以前咁樣，結合幾個無黨派建制派議員重組「早餐派」，似乎佢回歸政壇，絕對唔係想做投票機器咁簡單。雖然有咩人加入早餐派就未知道，但另一位自動當選嘅工業界議員林大輝，就話食早餐唔啱自己，鍾意食消夜多啲喎。
大輝尋日同傳媒聚會，講未來立法會政黨形勢時，被問到星爺有無搵佢加入早餐派，大輝就話星爺咁資深，自己無得比，又話自己好多年都無食過早餐，如果叫佢晨咁早起身食早餐會好辛苦。咁立法會內有咩人同大輝組成「消夜派」呢，大輝就話金融服務界參選人張華峯都係消夜愛好者。睇嚟大輝未來四年同咩人合作已心裏有數。
同大輝做過「五散人」嘅前會計界議員、現任發展局局長陳茂波，近日為劏房風波搞到頭都大，大輝建議佢應休假處理好私務先，如果處理唔好私務，就唔應該做公務嘞，唔知陳茂波聽到後有咩感受呢？金融服務界參選人仲有鄧予立、甄文星、李君豪、林德明。