政情：白鴿黨被鎅票 自食惡果

司馬文呢頭宣布放棄參加香港島直選兼退黨，嗰頭就話支持KK選超級議席，令KK喜出望外。司馬文話，遲啲會同民協開會商討選舉策略，亦會幫手打電話呼籲泛民樁腳轉投KK，但重申無計劃加入民協。有人自動投誠，處於滅黨危機嘅KK當然求之不得。KK話，雖然民協喺九龍區同新界西扎根多年，但至今仍然未能成功打入維港對岸嘅香港島；佢又大讚司馬文形象專業，可以彌補民協缺乏中產支持者嘅不足。

不過，民協同公文袋喺兩年前政改方案上立場不同，被問到司馬文投誠會否動搖民協支持者時，KK就承認同其他泛民政黨喺唔少議題上都存有分歧，但強調大家對雙普選嘅決心一致，又話希望呢啲分歧唔會影響選戰喎。司馬文嘅倒戈令KK信心大增，又話會增加香港島助選團人手，亦會準備多啲英文傳單派畀外籍人士，希望可以創造奇迹喎。

料搶走阿涂選票

司馬文突然轉軚投「馮」嘅情節可謂離奇過偵探小說，唯一解釋係佢不值公文袋同白鴿黨大搞密室政治令佢成為犧牲品，所以希望藉撐KK以𠝹走泛民選票洩憤，但此舉等同𠝹走阿涂嘅選票，令KK嘅當選機會大增。事態發展至今，相信兩黨萬萬估唔到司馬文會有倒戈呢一着，今鋪除咗白鴿黨自食惡果外，相信公文袋都要向白鴿黨有個交代。所以話呢，凡事做得太過分只會物極必反。