中環出更：楊華勇「造人」成功
匯聚城中精英才俊嘅香港菁英會，尋晚喺灣仔會展舉行第五屆就職禮，城中富二代雲集。香江國際集團主席楊孫西公子楊華勇（Johnny）雙喜臨門，除登上主席寶座外，仲宣布「造人」成功。Johnny新婚太太莊菲娜有喜，趕得切搭龍B尾班車，卓妮要講聲恭喜！
逾四百位菁英聚首一堂，慶祝新一屆執委誕生，立法會議員梁君彥公子梁宏正榮升常務副主席，接棒主席在望。不過，最風騷嘅莫過於Johnny，事關佢三月尾結婚，一擊即中，太太明年一月生得。Johnny就恨做爸爸恨到發燒話：「我好努力（造人）o架！」除呢單喜事外，仲有菁英姊妹快將出嫁，佢就係前恒生銀行女大班梁高美懿千金梁偉端，聽聞佢十一月嫁人，但伊人好口密，唔想多講。
洪為民病愈 聲如洪鐘
值得高興嘅仲有一單，剛卸任主席嘅洪為民（Witman）日前做完割除聲帶息肉手術後，一度只得「蚊螆聲」，但尋日已病愈復出，上台致詞一刻聲如洪鐘，唔通食咗仙丹？原來係言語治療師教佢「要講就放聲講」，唔好就住喉嚨講嘢喎。
講番晚宴，冠蓋雲集，包括創會主席施榮忻、副主席莊家彬、甄韋喬、盧金榮、鄭重科、秘書長蔡志婷、副秘書長王嘉恩、王文博等，而新任百仁基金主席李文俊都嚟打氣。席上仲有人稱「青年樓王」嘅廖創興家族後人廖偉麟（Jeffrey），過去半年佢豪擲五億港元，分別購入灣仔及九龍城商舖收租，但就冇打算炒居屋，擔心逼打工仔住貴居屋，寧願賺富人嘅錢，心安理得喎。
卓妮