好嘢好嘢！非常好嘢！東方報業集團再建奇功，而且係奇功打孖上！
先講第一件奇功吖。尖東南洋中心地下報檔有一隻叫做忌廉哥嘅七歲英國短毛貓，由於外形可愛趣致，討得不少街坊同遊客嘅歡心，成為尖東一帶人氣之星。之但係月有陰晴圓缺，貓有旦夕禍福，上月十日忌廉哥突然失蹤，主人認為一定係偷貓賊所為，簡直就係一宗貓貓綁架案。
東方報業集團率先報道忌廉哥「被失蹤」嘅驚人消息，吸引街坊自發性到處張貼啟事，眾志成城發起全城尋貓大行動。早兩日終於皇天不負有心人，人間蒸發二十五日嘅忌廉哥歷劫歸來，接受過十號風球洗禮嘅污糟貓樣重現尖東停車場梯間，管理員發現之後通知主人，結果合演一幕人貓情未了嘅大團圓結局。就係咁，貓主高先生多謝東方報業集團，又多謝熱心市民全城尋貓，令佢深深感受到香港人嘅互助精神。
至於第二件奇功，比起貓貓失而復得更加感人肺腑。三十二歲嘅廿四孝單親媽媽陳旭娟，可能由於工作同產後過度疲勞，突然肝臟急性衰竭命懸一線，如果冇得換肝就極度危險。經過東方報業集團詳盡報道以及積極呼籲，生命鬥士乍現熱血奇迹，過百位讀者聲稱願意捐肝救人。到最後，醫院一名剛剛去世嘅中年女子捐出肝臟，院方檢驗後認為適合，前晚將陳旭娟送入手術室齊心協力展開移植手術。經過八小時艱苦搏鬥，醫生向家屬宣布一個好消息：手術成功！
手術成功呢四個字，對於阿娟同佢嘅家人而言，重要性不下於贏得奧運金牌。或者咁講啦，陳旭娟女士敗部復活，贏得一面戰勝死神嘅特殊奧林匹克金牌。
所以話啫，打波先嚟落雨唔代表個天唔鍾意你，生命好多時候滿載奇迹。正所謂咯喎，山不轉路轉，路不轉人轉，人不轉心轉。點樣令到人心轉變呢？唔好怪功夫茶賣花讚花香，東方由始至終係令人心轉嘅正義傳媒。好似失貓事件咁吖，如果唔係東方率先報道，偷貓賊未必會作賊心虛「釋放肉參」。至於陳旭娟嘅成功換肝，更加證明正義傳媒絕對係有需要人士嘅好朋友。
當然啦，東方報業集團亦都應該多謝各位熱血沸騰嘅善長仁翁，如果唔係美麗嘅香港人發揮互助互愛嘅道德勇氣，貓未必尋得回，人未必救得番。容許開心到飛起嘅功夫茶語無倫次，香港運動員唔係垃圾，香港小市民唔係臘鴨！
講到最後呢一句係認真嘅，香港人，好精神，互助互愛嘅所有人都係金牌英雄！