政情：沈祖堯惋惜頹廢大學生
最近中大校長沈祖堯喺學生報讀到一篇題為《我所知道的大學日記》，令佢忍唔住喺網誌度分享佢嘅感想。到底個學生有咩迷思搞到校長要「轉載」呢？
文章以日記形式，講述學生「初嚟步到」，唔太適應校園生活。選科時組爸媽「通水」邊啲科目「易轆」，同高年級同學上課，又發現佢哋上堂釣魚，加上同房夜瞓，兼且取笑佢放學返去就溫書很「毒」很「宅」，令佢覺得很迷失，唔知應該跟大隊過「頹」生活，還是堅持自我做孤獨精好。
鼓勵尋找人生目標
文筆一轉，變成組爸媽嘅自我對話，講述自己要在三年大學裏好好享受生活，玩樂人生，燃燒青春。接住係另一篇日記，作者快將畢業，愧疚無好好讀書，對唔住父母。
沈校長睇完都難免感到惋惜，佢寫低網誌，鼓勵新生在未來三四年嘅校園日子裏，尋找佢哋情之所鍾嘅人生目標，築起夢想，認真對待大學生活，並謂大學教育唔係畀年輕人用嚟識派對朋友，亦唔係職業訓練，更唔係追尋舒適生活嘅機會。好明顯校長唔抵得學生咁頹廢，執筆提醒佢哋應該點做一個大學生。