每到選舉期間，候選人所做過嘅一切，大至投票立場，細至開會偷懶去廁所，都會被人翻舊帳。好似尋日電台搞嘅建築、測量及都市規劃界選舉論壇，候選人之一嘅劉秀成就被聽眾踢爆陳年往事，話佢曾經試過掛住去廁所都唔記得投票，問佢如果再次當選，會點縮短如廁時間。劉秀成聽到後即刻打個突，仲用現時最流行嘅招數拆解，話自己「唔記得」有件咁嘅事喎。
我哋翻查資料後發現，呢位聽眾真係好記性，絕對唔係老作，原來五年前劉秀成真係憑住「嗰一廁」，改變咗議會歷史。話說○七年唐英年仲做緊財政司司長，份預算案狂派糖，諗住以歷史高票通過之際，原本講明投贊成票嘅劉秀成因為食錯嘢，趕住去廁所「辦大事」。最終就以一票之差誤唐唐大事，令呢份預算案唔能夠以歷史最高票通過。
咁大件事都唔記得，劉秀成記性好差喎。唔知另外兩位候選人謝偉銓同吳永輝聽到後，會唔會喺之後嘅選舉論壇大打「廁所牌」呢？