做政客唔通除咗要識抽水，仲要厚面皮地嚴人寬己。尋日一個區議會超級議席候選人論壇，大家就示範咗呢一點。
坊間其中一項最熱辣辣嘅話題，當然係發展局局長陳茂波咸豐年前擁有劏房物業，一眾超級議席候選人尋日喺一個電台節目上都有唔同程度嘅抽水。
白鴿黨嘅「鐵頭仁」何俊仁搶先發炮批波波前言不對後語，要求波波交代清楚有關事件，該黨另一候選人涂謹申就直指波波講大話，而民協馮檢基仲連美國水門事件都拉埋出嚟講，直批波波講大話，遲早要落台。
民建聯劉江華見鐵頭仁插波波插得咁盡，都忍唔住翻鐵頭仁舊帳，指鐵頭仁之前亦曾喺立法會申報中漏報公司。事實係鐵頭仁亦曾涉及僭建問題同漏報公司，而阿涂之前涉嫌用公帑供樓、馮檢基之前租用僭建招牌，依家郁啲就叫人落台，咪就係嚴人寬己嘅最佳示範囉。超級議席候選人仲有白韻琹、李慧琼同陳婉嫻名單。