政情：「新西斌仔」誓揭穿白鴿假面具
今屆立法會選舉臨近，競選氣氛漸濃，而傷健人士亦加入助選團隊。近日新西多個街站車水馬龍之間亦穿插一個流動街站，全身癱瘓、坐住輪椅嘅鄭家龍（Sky）遊走新西多區，皆因佢對民主黨好失望，要揭穿該黨嘅假面具，今次挺身而出，支持人民力量嘅候選人。
自八月起，Sky就揸住輪椅遊走新西多區助選。Sky全身癱瘓，要靠佢架「戰車」輪椅出入，連同外界溝通都要透過下巴控制棒，透過電腦同人溝通，完全就係斌仔嘅翻版，但Sky就話，身體嘅遺憾唔能夠阻止佢發表對政治嘅睇法，「我有一個正常的腦袋，懂得分別對與錯」。
網民感動叫加油
Sky亦善用電腦呢個平台，用facebook同外界溝通，Sky話自己身體雖有缺陷，但有獨立思想，對於香港停滯不前嘅民主進程更加係非常憤怒，佢話要揭穿民主黨嘅假面具，於是為佢支持嘅候選人助選。網民都好感動，喺facebook同佢對話，叫佢加油，唔好曬親。