政情：潮商會破傳統 設婦委會
早排有報道話，女性智商百年來首度超越男性，所謂巾幗不讓鬚眉，男女平等早已經係社會大趨勢。超過一百一十年歷史嘅潮州商會即將喺九月正式換屆，會長由「飼料大王」陳偉南之子陳幼南交由「電子大王」周振基（Stephen）接棒。聽聞Stephen有意將商會改革創新，頭炮係成立婦女委員會。眾所周知，潮州人傳統重男輕女，今次婦委會成立，絕對係商會嘅一大突破。Stephen仲搵來名媛林李婉冰擔任婦委會主任，其他成員仲包括章曼琪、陳愛菁等，一眾潮女齊發威。
讀番書出身嘅Stephen，白手興家成立電子王國，係粵劇名伶林家聲嘅愛徒，曾經做過東華三院主席、中華企業家協會創會會長等公職。Stephen係出晒名嘅「愛妻號」，同太太Rita喺美國留學時邂逅，當年仍未發迹嘅佢，平日拍拖嘅節目，都係去公園散吓步，睇吓風景。有次佢哋喺三藩市一個公園談情，見到一隻鴿子飛過，佢就隨口話係「白鴿」，但Rita就話係「灰鴿」。
真正潮男 好錫老婆
自此之後，老婆話係白就白，灰就灰，起居飲食都交由賢妻揸旗，自己就專心打理盤生意。Stephen仲話過，真正嘅潮州男人其實係好錫老婆嘅，一切都以老婆為先喎。依家仲成立埋婦女委員會，一於話畀大家知，潮州男人唔係大男人。
潮州人向以和氣團結見稱，香港潮人咁多，商會每一屆嘅會董都會爭崩頭，所以今屆特意加設十張櫈仔至百一個位。據聞新增嘅會董名錄入面，有唔少都係商界巨子，有幾條大水喉射住，相信會成為商會嘅強大經濟後援。商會今屆成員仲有一大特色，就係同時有四個Stephen，除咗會長周振基之外，仲有亞洲金融集團董事長陳有慶嘅大仔陳智文擔任副會長，啤酒代理商葉振南擔任青委會主任，以及中西區區議會副主席陳捷貴做總務主任，認真有緣分。
另外，Stephen親自操刀設計新會徽，笑言做會長不但冇壓力，仲覺得好自豪，佢坦言多年來累積唔少領導經驗，身為潮州人能夠團結鄉親，與有榮焉。相信嚟緊商會喺佢帶領下，能夠帶來唔少新氣象。