中環出更：吳錦青營商 唔貴唔做
早前一個午膳時間，卓妮喺銅鑼灣時代廣場醫肚，見到博愛醫院總理吳錦青及太太黃海燕，原來佢哋間新世紀錶行就喺附近。吳錦青喺鐘錶界闖蕩廿幾年，依家正部署進軍地產業，躋身發展商之列。講起當年入行做鐘錶生意，原來都幾傳奇。話說吳錦青年輕時曾經做導遊，有次帶團遊日本，經過一間專賣日本錶嘅錶舖，老闆被佢手腕上戴住新簇簇嘅名牌手錶吸引，游說佢放低試賣，測試吓日本人對舶來品嘅反應。
寄賣靚錶獲啟發 掘第一桶金
吳錦青話，當年佢用成個月人工買隻靚錶獎勵自己，啱啱戴咗三日，幾經掙扎，決定開雙倍價錢留低隻錶，估唔到無耐老闆就通知佢隻錶已成功賣出。吳錦青當堂茅塞頓開：「原來有錢人嘅錢咁易賺！」於是開始做鐘錶出口到日本嘅生意，掘得人生第一桶金。日後無論做乜生意，佢都奉行「要做有錢人生意」嘅最高原則。現時除咗投資地產、名畫之外，又密謀做翡翠玉石生意，總之唔貴唔做。