由綽號「煲呔針」鄭經翰任大股東兼台長嘅數碼廣播，因為半數股東拒絕繼續注資，宣布營運至九月十一日後結業，成為港府發出數碼廣播牌照以來第一間玩完嘅電台，亦係香港有史以來最短命嘅電台。來也匆匆，去也匆匆，快過打風，真係陰功！
正所謂，殺頭生意有人做，蝕本生意冇人做。數碼廣播好似燒銀紙咁，投資有去無回，股東在商言商，算過度過，拒絕繼續注資都好正常嘅啫。奇就奇在鄭經翰唔話自己經營不善，反而將責任賴落一眾股東身上，指佢哋係受到中聯辦嘅政治壓力，要封佢咪，先至拒絕注資喎。嘩，雖然鄭大班一向聲大夾惡打橫嚟講，但勢估唔到居然無賴成咁，上綱上線上壞腦，賴天賴地賴政治，簡直九唔搭八。試諗吓，如果佢經營嘅係茶餐廳或者麵檔，執笠嘅時候可能一樣賴受到中聯辦政治壓力都似，你話好唔好笑吖！
嗱，聽吓其中一名股東黃楚標點講吖，佢話鄭大班初時為咗吸引佢哋落疊，吹水唔抹嘴，吹到個電台好易賺錢咁，一開始就要求佢科咗五千萬，呢兩個月仲話要集資多一億，你話點頂吖。話時話，作為生意人，股東只係想賺錢啫，呢個所謂數碼電台好似無底深潭，係人都怕怕喇。正如黃楚標話齋，曾試過搵人注資打救，弊在大班個朵已經臭晒，加上數碼廣播接收不清，收音機要擺喺窗邊先得，落到地底又收唔到，兼且又搵唔到廣告，根本無人肯接呢隻燙手山芋。
古人講得冇錯，國之將亡，必有妖孽。鄭經翰賴天賴地都唔係第一次嘅喇，當年佢喺商台主持節目，因為扭扭擰擰，五時花六時變，成日上演封咪鬧劇，商台忍無可忍之下炒佢魷魚，搞到狗咬狗骨，笑話百出。睇嚟呢條煲呔針同煲呔曾一樣，都係其心不正、枉作小人嗰種。
講開又講，香港回歸後烏煙瘴氣，亂象叢生，乜嘢怪事都有，數碼電台執笠賴中聯辦政治打壓又有乜出奇吖。大家都知，反中亂港傳媒一向惟恐天下不亂，佢哋同港英餘孽裏應外合，不斷煽風點火，搞風搞雨，令到香港社會愈來愈政治化，日嘈夜嘈，日拗夜拗，令人煩不勝煩。好似國民教育咁，佢哋話係洗腦就係洗腦，根本有佢講冇你講。計功夫茶話齋，如果國民教育係洗腦，咁鄭經翰之流不斷妖言惑眾，反中亂港傳媒日日散播白色恐怖，豈不是比洗腦更加可怕！