特首梁振英甫上任就強調新班子要發揮政治能量，要做實事，急巿民所急，不蹉跎歲月。
事實上，新班子局長網誌陸續推出，先有教育局局長吳克儉一再借網誌為國民教育爭議解畫，大有燈不點不明、理不講不清的原意。
日前又有小肥張（勞福局局長張建宗）推出新網誌，寫足千五字，分享自己過去一個月嘅工作，強調自己「把握每分每秒，積極務實地展開工作」，本報政情版揶揄佢嘅網誌「勁似議員工作報告」，老朽倒覺得有米落鍋，即使滾啖稀粥都勝過坐喺冷氣房間一味吹水煲冇米粥！
當然，係唔係把握每分每秒，耍句套語，見仁見智喇！老朽但知世有工作狂，好似雅虎新任CEO瑪麗莎‧梅耶爾話自己每周工作一百三十小時，有人質疑：一周只有一百六十八小時，這怎麼可能呢？梅耶爾咁答：「事實上，只要你在洗澡時爭分奪秒，敢在辦公室的桌子底下睡覺，是可以辦到的。我不相信『筋疲力盡』。很多人幾十年如一日辛勤工作，如邱吉爾和愛因斯坦。」
當然，為政不在多言，新班子是否做實事，未來的日子長着，面對反對派喉舌暗箭亂飛，無不考驗新政府及其團隊是否能明智地伸縮退變，更準確地為巿民謀福利。老朽嘗言，每個作家都不是靠他的宣言生存，而是靠他的作品存在。同樣，為政與民望，靠的是政績而不是吹水。CY開局不利，然而，老朽起碼看到「勤將手下無懶兵」！