特首梁振英（CY）出晒名鐵人，勤力兼唔使休息，平時已經做到天昏地暗，就連公眾假期亦會返辦公室繼續工作。不過，鐵人都有休息嘅時候，CY今日至九日會離港休假，係佢三月廿五日當選以來首個正式假期，而佢離港期間，會由政務司司長林鄭月娥署理特首職務。
當選特首後嘅CY，日日行程排得密密麻麻，籌組問責班子、會見各界別人士、落區同接受訪問等，總之就幾個月以來都從冇停過啦。所以今次佢連休五日，對佢嚟講簡直係罕見，特首辦方面就強調今次係私人休假，唔肯透露CY離港去邊度。
CY首次離港休假，林鄭亦係首次過特首癮。林鄭上屆做發展局局長，最多只係署任財政司司長，七月一日升官後，終於有機會做五日特首，雖然只係署任身份，但都算係過吓特首癮。林鄭多次重申冇政治野心，如果係真嘅話，咁署任就係佢唯一做特首嘅機會喇。